Сениорската репрезентација на Македонија во машка конкуренција денеска ќе ги добие своите противници за Светското првенство кое во јануари ќе се одржи во Германија и во Данска. Македонија влегува на оваа ждрепка од третиот шешир, а таму се и Катар, Австрија и домаќинот Германија.

Овие три селекции не се во комбинација за ривалство со Македонија на СП во првиот круг, а нема да биде ниту Кореја која е сместена во групата со Германија.

Како што е веќе практика во овие ждрепки четири селекции добиваат предвреме своја група и знаат во кој град ќе се натпреваруваат. Овој пат тоа се носителите Данска и Шведска, како и Хрватска која ќе игра во Минхен. Германците како домаќини го одбраа Берлин, па овој град не е опција за Македонија.

Секој од другите ривали е можен за Македонија. Јасно е дека од првиот шешир во комбинација се сите, но или Франција или Шпанија ќе заврши во групата кај Германија. Хрватите, пак, не можат против Данска и Шведска, а тие не можат ниту со Германија. Оттаму онаа селекција од носителите која нема да биде кај Германците ќе игра во група со Хрватите. Јасно е дека ќе има сили групи и никој не може да се надева на лесна ждрепка.

Почетокот на ждрепката е најавен за 12:30 часот, а ќе се одржи во Копенхаген.

ШЕШИРИ ПРЕД ЖДРЕПКА

1. Франција, Шпанија, Шведска (Група Д/Копенхаген), Данска (Група Ц/Хјернинг).

2. Хрватска (Група Б/Минхен), Русија, Норвешка, Унгарија.

3. Катар, Германија (Група А/Берлин), Австрија, Македонија.

4. Србија, Тунис, Исланд, Аргентина.

5. Бразил, Египет, Бахреин, Чиле.

6. Кореја (Група А/Берлин), Саудиска Арабија, Ангола, Јапонија.