По извлекувањето на групите на ЕХФ Лигата на шампионите, каде екипата на македонскиот шампион Металург ќе игра во групата “А” заедно со Кил, Псж, Загреб, Ла Риоха и еден квалификант ( Брест или Татран Прешов), со свои импресии излегоа и дел од ракометарите.

Наумче Мојсовски:

Добивме исклучително тешки противници и не чека голема борба. Без никакво сомнение фаворити се екипите на Кил и на Пари Сен Жермен, но тука е и Загреб, клуб со голема традиција. Екипата на Натурхаус оваа сезона гради респектабилен тим, а опасен ќе биде и квалификантот, без разлика дали се работи за Брест Мешков или за Татран Прешов. Но, и покрај се, сметам дека шансите на Металург се сосема солидни и очекувам пласман во наредната фаза

Ванчо Димовски:

Првпат не влечеа од вториот шешир и тоа нешто значи и вреди. Редно е другите да се плашат од Металург и нема да згрешам ако кажам дека влегуваме во тројката главни фаворити во групата, заедно со екипите на Кил и на Пари Сен Жермен. Не чека интересна сезона, голема борба, но и можност да ја задржиме позицијата која ја стекнавме во европскиот ракомет

Павел Атман:

Без разлика што основни фаворити во групата се екипите на Кил и на Пари Сен Жермен, а и Шпанците не се за потценување, јас лично сум презадоволен од групата и сигурен сум дека ќе се пласираме во следната фаза, а таму што биде нека биде

Филип Миркуловски:

Не чека уште една спектакуларна сезона, вистински празник за нашите фанови. Сметам дека екипата на Пари Сен Жермен нема да си дозволи две лоши сезони во Лигата на шампионите, Кил е Кил, па преостануваат Ла Риоха, Загреб и квалификантот. Од сите нив сме поквалитетни и со поголемо реноме, па, според мене, и најблиску сме до следната фаза во Лигата на шампионите