Започна пролетниот дел од македонската машка кадетска лига, а уште на самиот почеток се одигра дерби натпреварот меѓу скопските ривали Вардар и Металург. Ракометарите на Металург влегоа во пролетниот дел од натпреварувањето со предност. Победата на гостински терен кај „црвено-црните“, со пет погодоци разликата беше гаранција за возбудлив дуел и ракометно надмудрување меѓу екипите на Данило Брестовац и Зоран Петковски.

РК Металург 19-21 РК Вардар (8-7)

По почетните осум минути игра ракометарите на Металург имаа водство од 4-1, кое младите вардарци го анулираа во наредните три минути. До крајот на првиот дел се водеше рамноправна борба, во која главен збор имаа голманите на двете екипи Блажевски и Трпевски.

По почетните триесет минути игра домаќините од Автокоманда имаа предност од еден гол, 8-7.
Резултатската неизвесност се одржуваше во вториот дел, ракометарите на Вардар го изедначија резултатот, а играта гол за гол продолжи до 40-та минута.

Со прецизниот удар на Апостоловски, вардарци го превземаа водството и ја продолжија серијата од 6 голови во низа за предност од 12-16 по 45 минути игра. Во 52-та минута, Димов со својот единствен гол ја донесе највисоката предност на гостите од пет погодоци, 14-19.

Вардарци имаа неколку шанси за шест голови предност, со што би го превземале првото место на табелата, но брзоплетите напади, концентрираната одбрана на Металург и голманот Блажевски беа виновниците за разликата од три погодоци по шеесет минути игра, 19-21.

Најпрецизни на натпреварот беа Димитриоски за Металург и Мирчев за Вардар, двајцата со по седум постигнати погодоци.
Дека младите ракометари на двете екипи за свој пример ги земаат постарите ракометни „ѕвезди“ покажа и денешниот натпревар. Најпрво во најспортскиот потег на целиот натпревар, Анастасовски на раце го изнесе својот колега од спротивниот табор по заработената повреда.

…и кога сите помислија дека ракометното дерби започнува да го добива оној спортски сјај, во последната минута од натпреварот, откако беше грубо фаулиран од ракометарот на Вардар Јагуриновски, Стојковски со неспортски потег иницираше судир на двете екипи по кој беа поделени два црвени картони на главните иницијатори на конфликтот.

Конфликти кои беа неизоставен дел од големите дерби натпревари на најдобрите состави на Вардар и Металург изминативе неколку години, остана дел од наследството.

Откако се смирија страстите и натпреварот заврши домаќините им честитаа на подобрите, задоволни бидејќи и покрај поразот тие остануваат на првата позиција во разигрувањето за титулата.