Полскиот репрезентативен пивотмен Камил Шипжак, ја игра својата последна сезона во Барселона. Тој сезонава добива мала минутажа од тренерот Чави Пасквал, а договорот му истекува на лето, но сосема сигурно е дека нема да му биде продолжен.

Барселона оваа сезона го донесе Лудовик Фабрегас од Монпелје, кој ја дели минутажата со неговиот репрезентативен колега, Седрик Сорендо, па Шипжак или е на клупа, или воопшто не е во ростерот за дуелите од Лигата на шампионите.

Тој најчесто добива шанса во Асобал лигата, а во ЛШ одигра пет од десет меча и постигна осум погодоци. Негова следна дестинација најверојатно ќе биде Франција, а оттаму се интересираат Нант и Монпелје.

Монпелје на линијата го има Фредрик Петерсон, а Нант го има Николас Турна, кој ќе оди во Келце на крајот на следната сезона, па поверојатно е Шипжак да се реши за Нант, каде за соиграч повторно ќе го има Кире Лазаров, со кој минаа една сезона заедно во Барселона.