Тимот на Еурофарм Работник годинава стигна до најголемиот клупски успех во Европа и стана втората македонска екипа во групната фаза од ЕХФ Купот по Струмица. Битолчани го елиминираа швајцарскиот Берн со две победи и се пласираа во групата со Хановер, Нексе Нашице и Татабања. Еден од поискусните играчи кај „фармацевтите“ е десниот бек Михаил Петровски. Тој по настапите во Унгарија, Франција, Данска и Романија, се врати во нашата земја и вели дека уште на струшкиот турнир го видел потенцијалот на неговиот тим за повисоки дострели оваа сезона.

Во интервјуто за 24Ракомет, тој говори за подготвителниот период на Еурофарм Работник, за пријателските средби, очекувањата од настапот во групната фаза на ЕХФ Купот, како и за градскиот ривал Пелистер и средбите од македонската Суперлига.

„Оваа сезона уште на турнирот во Струга дадовме одлични партии, бевме во егал со сите екипи. Се надзираше потенцијалот на оваа екипа, продолживме со исто темпо и во првенството и имавме доволно време да се подготвиме за двомечот со Берн. Искрено донекаде и го очекував пласманот во групната фаза на ЕХФ купот, иако морам да признам дека не беше ни малку лесно како што изгледаше резултатски“, започнува Петровски.

Еурофарм Работник се комплетираше само пред неколку дена кога во Битола пристигна последното засилување, Невен Стјепановиќ, кој игра на десната бековска позиција. Претходно тимот се засили со украинскиот лев бек Владислав Остроушко, како и десното крило Мирко Радовиќ.

„Со доаѓањето на Острушко, Радовиќ и Стјепановиќ, Еурофарм доби на квалитет дефинитивно, затоа што тренерот има на располагање по двајца играчи на секоја позиција. И тоа е нормално за една екипа која се натпреварува на три фронта истовремено“, смета Петровски.

Во групата од ЕХФ Купот, Еурофарм Работник ќе се соочи со Хановер од Бундес лигата, со Нексе кој сезонава го победи Загреб и со Татабања, која исто така запиша голем триумф над Веспрем.

„Ова што го кажавте доволно зборува за какви екипи се работи. Можеби пехот со повредите на некои играчи го ставија Хановер на 14 позиција во Бундес лигата. Меѓутоа во таа екипа има играчи од типот на Атман, Олсен, Бом…Победата на Татабања над Веспрем не е случајна. Таа е на само бод зад Веспрем и тоа само кажува за каква екипа се работи. Нексе е екипа која ќе води главна битка со Загреб за титулата во Хрватска и на чекор е од Ф4 од СЕХА лигата. Така да сите три екипи се навистина квалитетни“, продолжува Петровски.

Еурофарм Работник одигра седум натпревари во подготвителниот период. Оствари победи над Охрид и Спартак Суботица, а загуби два пати од Железничар, како и од Динамо Панчево, Војводина и ПИК Сегед.

„Подготвителниот период го обработивме некомплетни. Ни недостасуваа играчите што играа на светското првенство, Остроушко ни се приклучи последниот ден, Стјепановиќ не ни беше со нас, ако се додаде на тоа дека и дел од ракометарите влечеа некои ситни повреди и не настапија на некои натпревари, приморани бевме за десет дена да одиграме шест натпревари со крајно лимитиран состав. Меѓутоа тоа е само подготвителен период и пријателски натпревари каде резултатот не беше во прв план, а главното допрва следува“, вели леворакиот шутер.

„Фармацевтите“ и лани имаа шанси, но не успеаја да му го одземат второто место на составот на Металург. Но годинава имаа поконкурентен состав и се надеваат дека ќе можат да бидат учесник во СЕХА лигата наредината сезона.