Еден од противниците на Македонија на СП во Франција, репрезентацијата на Тунис, по ремито во првиот дуел на „ХЕП Кроација Куп“ во Умаг со Црна Гора, 31:31, загуби од домаќинот Хрватска со убедливи 35:30.

На стартот Хрватска стигна до предност преку Штрлек, а Бугами израмни на 1:1. Потоа „каубојите“ направија добра разлика и поведоа со 5:3, па 6:4, а беше и 8:5. Тунижаните не се предаваа и успеаја со серија голови преку Теж и Буганми да дојдат до реми, 9:9. Сепак, избраниците на Бабиќ преку Јотиќ и Хорват ја вратија предноста, за 13:9, а на пауза се замина со 20:14.

Во вториот дел Хрватите уште повеќе се разиграа. Циндриќ, Степанчиќ и Козина внесоа нова свежина во играта и водството беше зголемено на 27:19, по што веќе немаше дилеми околу победникот. Сепак, тунижаните беа упорни и до крајот ја преполовија високата негатива  за конечни 35:30.

Најдобри во хрватскиот состав беа Штрлек и Мандалиниќ со 4 голови, додека Лука Циндриќ имаше 3 од 3. Кај Тунис, како и на дуелот со Црна Гора се истакна Усама Буганми со 9 голови, додека Саид имаше 5 од 5, а Жалуз постигна 3, исто колку и Банур.

Македонија ќе се соочи со Тунис во првото коло од Мундијалот на 12 јануари.