Во првиот натпревар на програмата од вториот ден на интернационалниот ракометен турнир Струга 2014, екипата на Азоти Пулави предводена од Драган Марковиќ ја совлада екипата на Кретејсо 30-25 и ја остави отворена битката за финалето.

Во почетните минути двата тима ги одмеруваа силите, но немаше ништо конкретно од двете страни се до 21-та минута кога полјаците за прв пат поведоа со три голови предност за 11-8. Водство кое го задржаа до краj на натпреварот. Нервозата на натпреварот беше забележителна посебно на клупата на Азоти, игра со груби стартови и агресивност во одбраната кои на момент ја преминуваа спортската граница. Екипата на Пулави се коцкаше, често играше со маркер коj на крај им донесе победа и шанса против Металург да изборат финале. Најпрецизен во екипата на Пулави беше Крајевски со седум погодоци, додека Уго Деска постигна 9 погодоци од кои два од линијата на седум метри беше најдобар меѓу поразените. Борко Ристовски влезе во игра на крај на второто полувреме и имаше една интервенција, додека на другата страна во екипата на Азоти, рускиот репрезентативец Богданов имаше 11 интервенции и беше најзаслужен за победата на полскиот состав.