„Продадовме 98% од тикетите, што е неверојатен показател за привлечноста на натпреварувањето. Сè уште не ги знаеме финалните бројки, но претпоставуваме дека ќе имаме милионски профит“, стои во извештајот.

Сега во Германија целат кон тоа да ја зголемат нивната активност и со самото тоа посетеноста на Европското првенство во 2024 би било на уште повисоко ниво. Германските спортски преставници сакаат да ја намалат цената на тикетите со што посетеноста би срушила нов рекорд.

Натпреварите од Светското првенство 2019 година, биле следени од 902.505 гледачи. Во Германија присуствувале вкупно 538.168 гледачи, додека во Данска, 366.337 гледачи.

Претходниот рекорд на посетеност на некое европско или светско натпреварување организирано во Германија бил на Светското првенство во 2007 година, каде присуствувале околу 150.000 луѓе помалку.

Завршивме со победа, но овој триумф беше неубедлив. Се потврди она што го зборував пред почетокот на турнирот. Се виде дека сите играат ракомет и дека нема голема разлика меѓу репрезентацииите. Сепак, добро е што успеавме да победиме бидејќи ќе беше лошо ако загубевме. На вакви средби не добиваш ништо, а губиш многу. Ако загубиш ќе биде вистински циркус, ќе има критики од сите страни. Ако победиш тоа е нормално и очекувано.

Очигледно е дека се забележа замор кај ракометарите особено кај оние што го понесоа товарот. Во текот на целото првенство играа главно 6-7 ракометари и не е воопшто лесно. Едноставно требаше да добијат шанса и други ракометари на овој дуел, а гледано во целост требаше да се направи една сосема поинаква селекција.

Не ни одговара да играме со ваков систем. Седум натпревари во десет дена се многу. Сметам дека на крајот сме на реално место каде што треба да бидеме бидејќи ова не е најдобрата репрезентација на Македонија, а некои ракометари неправедно беа запоставени. Еден дел од играчите се и во послаби лиги. Требаше поинаква селекција, а кога веќе некои играчи беа земени за настап на Мундијалот тогаш мораше да играат повеќе.

Грешката според мене беше направена уште на старт. Кога веќе поведовме со 8-9 гола разлика против Јапонија требаше да влезам помладите и да почувствуваат како е. Ние вака ги пуштивме во оган против Шпанија каде одиграа цело полувреме и само ги изгоревме.

Ова е далеку од подмладување. Можеби на хартија бевме подмладени, но на терен играа Кире, Гоце, Филип, Столе, Жарко… Се виде добро дека тие што имаат минутажа во своите клубови се и најдобри на теренот. Голманите, Лазаров, Манасков… Тие се тие што отскокнуваа од другите.

Нас на ова првенство ни недостигаше многу и Миркуловски. Недостигаш организатор како него. Сега би се потсетил и на моментите кога оваа репрезентација бележеше успеси и ги имаше најдобрите резултати. Секогаш велам и сега исто. Тогаш во тимот го имавме Владимир Темелков, играч кој игра одлично одбрана и одлично во напад. Тој игра во двата правци, а сега немаме таков играч на позицијата десно крило. Ракометот со многу измени се виде дека изумира.

Со барањето 7 на 6 во напад се виде дека загубивме многу бидејќи едноставно ги загубивме нашите бекови. Немавме играчи кои би можеле да дојдат до шут на таква игра и затоа мораше секогаш посекоја цена да се оди на проигрување на пивот или на крило.

Сега кога е сè завршено треба да се преиспита сè и да се направи добра и детална анализа за настапот на Мундијалот. Треба да се види што и како е направено. Мора да се почне со давање на шанса на помладите бидејќи така се почнува. Сите почнавме од некаде и стигнавме таму каде што стигнавме. Кога веќе беа таму тие мораа и да играат повеќе.

Мораме да бидеме реални. Јапонија и Бахреин ги победивме и тоа беше очекувано, но потоа моравме да ги штедиме најдобрите за дуелот против Исланд. Не можевме да бидеме сигурни и така дека ќе ги победиме, но барем ќе бевме свежи и ќе се обидевме. Вака против Шпанија влеговме едно силно полувреме, па за две минути го загубивме мечот. Исто и со Хрватска се потрошивме премногу. Тешко е секој втор ден да се играат вака силни натпревари на кои постојано се трча 60 минути, те удираат, те трошат…

Мораме да размислиме добро, да направиме стратегија. Ракометот е спорт број 1 во Македонија и сите мораат да го дадат својот допринос. Мораме да видиме што ќе правиме кога Кирил Лазаров, Борко Ристовски, Стојанче Стоилов ќе се повлечат од националниот тим. Мораме да имаме стратегија за после нивната ера.

„Финалето се добива, не се игра“ беше изјавата на Андреа Лекиќ пред дуелот со Ѓер во финалето на лигата на шампионите. Малку недостасуваше ова да биде реалност. Вардар играше, беше чекор до „добивање“, и не разочара во Будимпешта на Ф4 турнирот. Загуби во финалето, дури по продолженијата, 30-31, но остана впечатокот дека тимот конечно е созреан за високи дострели. Можевме и веројатно требаше да се искористи и подадената рака да го зграбиме пехарот, и тоа е она што најмногу ќе ги боли ракометарките.

За разлика од претходните три сезони, овојпат никој не ги надигра. Прво му одржаа лекција на сега поранешениот европски првак ЧСМ Букурешт, а потоа беа во игра до крај, се боре „машки“ и жестоко со трикратниот првак, Ѓер. На крајот можеше и ќе беше исто така заслужено „црвено-црните“ да бидат тие што ќе го отвораат шампањското. Тоа ќе беше круна на сите напори вложени сезонава, надминување на сите проблеми со кои се соочуваа, и поттик за машката екипа која со сличен предзвик ќе се соочи за три недели, но во Келн.

Четири години Вардар чекаше да дојде до шанса вистински да се бори за злато во лигата на шампионите, и секунди го делеа од најголемиот клупски успех. Го имаа последниот напад во свои раце, но ја немаа акциијата што требаше да им донесе шампионски гол. Дури и во продолженијата беа во игра, но 130 мнути на терен за 24 часа не секогаш може лесно да се издржат. Токму последнот напад со кој можевме да победиме покажа дека немаме решение за „брз напад“ од 10-15 секунди што би го решиле во наша корист.

Ќе има, и треба клубот да направи анализа, каде е пропуштена шансата. Да се најде и одговор зошто во финалето немаше повеќе минути за Андреа Кликовац како дефанзивец, за Сања Дамњановиќ како среден бек, па и за поагресивно играње на ракометарките на Ѓер, особено Мерк. Дали Хмирова искористи премногу кредити, и то атокму во најважниот меч на сезоната. Беше ли изненадување реализација на Горбич од крило во првото полувреме, или свесно беше пропуштана со надеж дека голманите ќе одбранат нешто.

Се жалеа вардарки при објавувањето на номинацијата на руската двојка за полуфиналето со ЧСМ Букурешт. Се сомневаше управата на Вардар за некаков конфликт на интерес. Но, се покажа дека токму Русинките „свиреа“ праведно, а проблемите дојдоа во финалето. Играчите по натпреварот беа лути на многу судиски одлуки, на одолговлекувањето на нападот на домашниот тим. И со право, но исто така играчите беа и самокритични дека во текот на натпреварот требало самите да решат многу ситуации, да реализираа многу шанси.

Мора да признаат од нашиот тим дека самите се виновни што не се враќаат со златото, а помалку да размислуваат на судите. Очигледна беше наклонетоста на судиите кон едниот тим, кои дозволија груба игра, толерираа долги напади на Ѓер, груба игра, па се до некоректниот потег на делегатот со земањето на картончето за тајм аут. Очигледно беше кој треба да победи, само сценариото не изгледаше лесно за реализирање. И сега е вистински момент да се издвојат судиските грешки и истите да се достават до ЕХФ, и да се потсети европска куќа и да се „притисне“ за пофер судии во иднина.

Жалењето нема да им ја донесе титулата на вардарки, но добро е да се знае дека имаше и надворешни фактори кои не дозволуваа наша победа. Ни дозволија да се вратиме, но не и да победиме.
Вардарки како никогаш досега беа ментално силни, тимски сплотени, зрели за она што на многумина од играчите им недостасува – европска титула. Покажаа смиреност и во моментиите кога судите имаа различен аршин на теренот, кога покажуваа различни одлуки и кога имаа 3-4 гола негатива, кога повеќе минути немаа постигнато гол. Ништо н еги поколеба, ниту откажа.

Ова сезона во која дури три главни тренери се сменија: Индира Кастратовиќ почна, продолжи Давид Дејвис, а заврши Ирина Дибирова. Во меѓувреме на клупата беше и Едуард Кокшаров, Аце Станковски и Сергеј Самсоненко. Многумина велеа „многу бабици – килаво дете“, овојпат крајниот исход секако е задоволителен, иако најмногу играчите треба да кажат колку овие промени делуваа на нив.

В година екипата ќе биде без неколку играчи. Алтхаус веќе најави заминување, Мавсар и Херем тоа го имаат потврдено. За Песоа е се` поизвесно дека исто така ќе замине, исто како и Сања Дамњановиќ. Засега единствен нови играчи се Драгана Цвијиќ. Пукнатините во тимот ќе треба да се пополнат со квалитетни играчи. Можеби некој и од вториот тим да добие шанса, но само со квалитетни играчи ќе може в година да се надеваме на враќање во Будимпешта по злато.

Освоивме бод кој е еднаков на победа, покажавме карактер кога е најтешко и заслужено сме во 1/8 финалето. Клуч на успехот на овој натпревар е периодот од 40 мин, и нашата игра во одбраната и на голот расположениот Кирил Колев. Го завршивме настапот во групната фаза според планираното , играјќи топло ладно, но со оглед на фактот дека во ростерот имаме шест дебитанти, мала помош од позицијата лев бек и што би рекол еден колумнист од соседството го рушиме законот на гравитација со резултатот кој што го постигнавме во групната фаза.

Мечот го одигравме во стилот „топло-ладно“, започнавме извонредно и не му дозволивме на противникот да игра според посакуваното, и тоа пред се со нашата играта во одбрана.  Имавме четири успешни интервенции на голманот Колев,  и Исланд постигна гол после 7 минути па ние имавме водство од убави 4-0. Но, по само две минути и наша лоша игра во нападот Исланд направи пресврт за водство 5-4.  Но, после добриот почеток, наместо да одиграме во ист ритам, ние попуштивме. Серијата од 9-2 им овозможи на Исланѓаните да имаат водство од 9-6. Тоа беше знак за прв тајм аут на нашиот селектор. Се „размрда“ малку нашата игра, се подобри и играта, а на голот го имавме и расположениот Колев за пристојни 13-15 на полувреме.

Второто полувреме го започнавме исто така со многу грешки во нападот што резултираше со лесни голови на Елиасон, за највисоки 16-21 во 40 мин. и повредата на Миркуловски која што дополнително ги усложни работите. Од тогаш до крајот на натпреварот Македонија покажа карактер, со добра игра во одбраната 6-0 одигравме период во кој направивме серија 7-1 , но притоа го загубивме и Манасков, за на две минути пред крајот да поведеме со 26-25, и влеземе во неизвесна завршница при тоа, при резултат (27 -27), аргентинските судии кои не се снајдоа на натпреварот досудат сомнителни чекори на Лазаров и дозволат Исланд да го има последниот напад за победа кој за наша среќа, заврши неуспешно за конечни (27-27), а  Колев го одбрани ударот на Закрисон.

Искрено се надевам дека рушејќи го законот на гравитација ќе ја срушиме и екипата на Норвешка и ке бидеме патници во ¼ финалето .

За кого !!! За Македонија !!!

Стевче Алушовски

Во првите пет минути од второ полувреме имавме проблеми во нападот на позицијата лев бек и како плод на тоа имавме старт 0:3, сè до влегувањето на Филип Лазаров. Тогаш работите дојдоа на свое место и нашата репрезентација направи серија од 5:1 за мирна завршница и можност сите 16 ракометари да дадат свој придонес во оваа победа.

Она што можеби нашиот селектор подготвувајќи се за овој натпревар не го имаше ставено во својaта „билежница“ е тоа дека толку ќе се потрошат некои од клучните играчи, пред сè мислам на Кирил Лазаров и Филип Миркуловски, и дека младите играчи ќе бидат без поголем придонес на овој натпревар. Тоа е еден факт кој што треба да загрижува пред трите следни противници во групата. Она што е позитивно е стандардно добрата игра на клучните играчи и сигурноста на голманите кои од натпревар во натпревар се сè подобри.

Два натпревари се зад нас како добра подготовка за влез во претстојните три многу значајни натправари за што подобар пласман и што послаб противник во 1\8 финалето. Натпревари на кои ќе треба да се гине за секоја топка и на кои ќе немаме право на вакви осцилации во играта како на дуелот против Ангола.

За кого! За МАКЕДОНИЈА !!!

Стевче Алушовски

Натпреварот го започнавме според најавите на стручниот штаб, со игра 7 на 6 во нападот со изненадувањето Неловски на лев бек и Велко Маркоски на кружен напаѓач со цел да правиме една измена во транзиција одбрана – напад. Тоа ја неутрализираше агресивноста на зоната на туниската репрезентација и нашите играчи лесно доаѓаа во изгледна позиција за шут. Во одбраната нашите репрезентативци одиграа извонредно агресивна 3-2-1 што помалку беше изненадување за тунижаните. Одигравме многу паметно во фаза на нападот и благодарение на нивниот голман не отидовме на полувреме со предност од неколку голови. Свежината во играта селекторот ја одржа со замена на Нелоски со Талески и на браќата Марковски на пивотменската позиција. Проблем во фаза на одбрана ни правеше играта со два кружни напаѓачи која многу слабо ја решававме во првото полувреме, полувреме кое го завршивме со еден негатива, благодарение како што реков на неколку промашени изгледни ситуации и некои отпадоци (одбиени топки) во фаза на одбраната кои туниските играчи ги реализираа.

Второто полувреме го започнавме со промена на одбраната во 6-0, која на почетокот беше порозна и не успеваше да ја стопира играта помеѓу Сајед средниот бек и Теж пивотот на Тунис кои ни правеа огромни проблеми пред се тунискиот среден бек кој беше нерешлива енигма за нашите одбранбени играчи. Конфузно го започнавме второто полувреме како во одбрана така и во напад(направивме неколку неизнудени технички грешки) и за десет минути се доведовме во ситуација од -4 (20-24) во 40мин. Неколкуте врзани исклучувања во туниската репрезентација брзо нè вратија (за само 5 минути ) во егал ситуација, која за наша среќа знаевме да ја валоризираме кога на противникот му „влезе вода во уши“ и со серија од 14-6 во последните 20 мин., ја извојуваме првата многу значајна победа за нас на ова СП.

Исто така треба да радува фактот дека ова е голема победа, ако се знае тоа дека во фаза на нападот направивме само 6 технички грешки што е одлика на врвни репрезентации, Лазаров како секогаш МВП на мечот, стандардни Манасков, Стоилов, Миркуловски изненадувачки добри за дебитанти на едно првенство Неловски, Талевски, Колев, Трајковски… со свој придонес Ѓеоргиевски, браќата Марковски, Ф.Лазаров, Ојлевски доволно за прва победа која ни ги подотвара вратите од 1/8 финалето на СП. Простор за напредок како колективно така и индивидуално и во фаза на одбрана и во фаза на напад има и со секој нареден натпревар, сигурен сум ќе го видиме кај нашата репрезентација.

За кого! За Македонија !

Стевче Алушовски

1. Шпанија

Селекција која е најголем фаворит за освојување на групата Б. Селекторот Рибера, малку е неодреден. Дали има подмладување или не. На ова првенство доаѓа со искусни ракометари, меѓутоа и многу млади ракометари затоа со интерес ќе го пратам изгледот на шпанската репрезентација и нивната игра на овој мундијал. Го имаат најдобриот напаѓач Агинагалде кој заедно со спрегата од тројца бекови претставува опасност за секоја одбрана. Тука е и искусниот Канелјас. Тие ќе имаат две измени од напад во одбрана и тука Македонија ќе треба да ја бара својата шанса. Многу ќе зависи  и од формата на Душебаев во одбрана, можеби ќе треба да се напаѓа преку него во нападот… Не би ги вклучил меѓу фаворитите за освојување на Светското првенство, но секако дека се први фаворити за освојување на нашата група.

Клучни играчи се голманот Перес Де Варгас, Жоан Канелјас и Хулен Агинагалде. Голманите секогаш се клучен дел од формата на една репрезентација затоа многу работи ќе зависат од Перес Де Варгас. Исто така искусниот Жоан Канелјас ќе биде еден од клучните ракометари на овој турнир, како и најдобриот напаѓач пивотменот Хулен Агинагалде.

2. Словенија

Словенија е уште една од редот репрезентации кои конкурираат за втората позиција, заедно со Македонија, Исланд и Тунис. Можеби ќе имаа мала предност во однос на дуелот со Македонија бидејќи нивниот селекторот најубаво ги познава нашите ракометари, што е голем плус. Бидејќи кога ги познаваш ракометарите полесно можеш да поставиш одбрана. Сепак она што е позитивно кај Македонија е што веројатно ќе ја менуваат одбраната на овој дуел. Тие сигурно ќе бидат ослабени на овој турнир, бидејќи знаеме што значат Бомбач, Зорман и Шкоф за словенечкиот тим. Но имаат добри бекови одличен кружен напаѓач, така што претставува „скоцкана“ репрезентација која не треба да биде баук за нас. Една од репрезентациите против кои можеме да се надигруваме, меѓутоа најмногу ќе зависи од одбраната која ќе ја играме.

Од Зарабец ќе тргнува сè во репрезентацијата на Словенија и доколку го спречиме него завршивме голема работа. Доколку одиграме една длабока 5-1 одбрана, го неутрализираме централниот бек и спречиме брзи продори можеме да се надеваме на позитивен резултат.

3. Македонија

Зборувавме за подмладување, но не знам колку можеме тоа така да го наречеме бидејќи Кузмановски нема да настапи на овој шампионат, а Нелоски е повреден и не знам колку ќе може да придонесе. За мене најголема непознаница е голманската позиција. Несфатливо е да донесеш дебитанти со над 30 години во А селекција, а да ги имаш слободни Ангелов и Никола Митрески. Многу е битно искуството на голманите на еден ваков турнир и голем ризик е овој потег, затоа навивам да бидам демантиран, односно голманите да бидат најдобриот дел од нашата игра. Зборувам за голманите бидејќи во нападот стандардно ги имаме Манасков, Талески, Миркуловски, Лазаров и Георгиевски, а во напад одбрана ќе се менуваат Лазаров и Велко Маркоски. Меѓутоа ако ја промениме зоната во одбрана на 3-2-1 тогаш можеме многу, бидејќи ние Македонците и како нација и по физикус можеме одлично да се снајдеме во таква одбрана.

4. Исланд

Исланд ни е добро познат противник. Тие започнаа со подмладување на ова Светско првенство, требаше да бидат предводени од одличниот Арон Палмарсон и тоа сигурно е голем недостаток. Исланд иако е мала земја секогаш имала квалитет. Дел од поранешните репрезентативци заминаа во пензија, а дел сами откажаа пред овој мундијал, но Исланд е репрезентација со голема традиција, имаат челичната волја и предводени од Сигурднсон секогаш по освојување на топката стартуваат со брз контра-напад без разлика на противникот. Можеби нема да атакуваат на врвот, но убеден сум дека ќе направат некакво изненадување на овој турнир. Сè зависи од Македонија на овој дуел, како ќе отвориме и како ќе играме во одбраната.

5. Тунис

Тунис е ракометна земја и редовен учесник на Светските првенства. Тие имаат слични физички предиспозиции како Ангола, но за разлика од нив тие се технички подобро подготвени и тука е клучната работа. Се надевам дека Македонија ќе освои бодови против нив, но нема да биде воопшто лесно бидејќи играат брз ракомет и имаат голема ракометна традиција. Во одбраната знаат да одиграат длабока формација каде се ќе одлучува играта „еден на еден“. Тунис игра агресивно, Жалуз е нивниот најзначаен играч, нема да биде лесно да се освојат бодови на овој дуел. Многу е битна играта без топката и промената на одбранбената зона во македонската селекција која треба да даде резултат. По квалитет е тука некаде со Македонија, но со добра игра мислам дека Македонија може да дојде до нови бодови, иако ќе биде многу тешко.

6. Ангола

За разлика од женскиот ракомет, машката селекција на Ангола нема позначајна улога во светскиот ракомет. Иако немаат подеднаков квалитет како останатите репрезентации во групата Б, сигурно ќе бидат незгоден противник. Тоа значи дека не треба да се потценат. Кога зборуваме за Ангола имаме малку информации, тие малку заостануваат по квалитет од другите репрезентации, но сигурно не се на мундијалот случајно. Македонија сигурно дека ќе ја гледа шансата против нив.

Стефче Стефановски

1. Германија

Европскиот првак е главен фаворит за освојување на групата во Руен. Под водство на новиот селектор Дагур Сигурдсон, тие повторно се во самиот врв на светскиот ракомет. По освојување на Мундијалот во 2007 година, славата во германскиот ракомет ја превземаа бундеслигашките клубови. Откако во Катар се пласираше преку вајлд-карта, Германија се врати на голема врата освојувајќи го европскиот шампионат минатата година. И покрај недостатокот на искусни играчи, младите германски репрезентативци, златото од европскиот шампионат го надоградија со бронза од олимписките игри. Практикуваат брза и енергична игра, која ги носи во Франција како фаворити за подиумот на Светскиот шампионат. Ова ќе биде последен турнир за селекторот Дагур Сигурдсон на клупата на Германија. Архитектот на новата подобрена верзија на Германија започнува нов предизвик со јапонскиот национален тим веднаш по мундијалот во Франција. А, исландскиот стратег сигурно ќе сака да го затвори поглавјето во германскиот национален тим во голем стил.

Клучни играчи: Холгер Гландорф и Андреас Волф

33 Годишниот десен бек на Фленсбург, Холгер Гландорф повторно ќе биде дел од големите собири, откако се збогуваше од националниот тим во 2014 година. Селекторот Сигурдсон се одлучи за искуството на десниот бек, кој своето деби во националниот состав го имаше во 2003 година, а досега има постигнато 576 голови за својата земја.

Чуварот на мрежата на Кил, Андрес Волф беше еден од клучните ракометари во освојувањето на европскиот шампионат минатата година. Со високиот процент на одбранети удари и одличните реакции во клучните моменти на натпреварите од ЕП ги придоби симпатиите на германскиот национален тим, но и почитта од сите љубители на ракометот.

2. Хрватска

Хрватска е една од најтрофејните репрезентации во поновата ракометна историја. Има вкупно 13 медали од олимписките игри, светските и европските првенства. Хрватска никогаш не испуштила настап на едно големо натпреварување, а последниот медал го освои на Европскиот шампионат во Полска, каде завршија како бронзени. Хрватска, која изгуби неколку клучни играчи ќе биде во доста изменет состав во Франција. Дувњак е тука клучен играч и околу него еден куп млади играчи желни за докажување, артилерија од типот на Мамиќ, Јотиќ и Мандалиниќ, добро ќе се надополнуваат со Циндриќ и Обрановиќ.

Натпреварот кој го одбележа Европскиот шампионат, високата победа над домаќинот Полска која им овозможи пласман во полуфинале, не се повтори на Олимписките игри.  Елиминацијата во четвртфиналето на Олимпискиот турнир во Рио, го зема својот данок и под притисок на јавноста тренерот Жељко Бабиќ поднесе оставка. Но по само два месеци повторно беше назначен да ја предводи новата генерација хрватски ракометари. Ова е сигурно последна шанса за докажување на кормиларот на клупата на Хрватска, бидејќи Хрватите очекуваат на ист начин да им вратат на Французите за поразот во финалето на СП 2009 во Загреб. Сè на сè интересно ќе биде да се гледаат, сметам дека се во мала предност во однос на Унгарија за второто место во групата.

Клучни играчи: Домагој Дувњак и Мануел Штрлек

3. Унгарија

Унгарија која настапува во најсилниот состав моментално и со враќањето на Фазекаш дава до знаење дека на ова првенство оди да стигне што подалеку. Со искуството на Фазекаш, Миклер доби грб и голманската позиција ќе им биде навистина стабилна. Наѓ, кој е движечка сила во нападот, ги има позади себе Анчин и Балог, кои ја прават позицијата десен бек одлична. На лев бек минутажата би требало да ја трошат Бодо и Џамали, кои немаат одиграно ништо позначајно на едно големо натпреварување. На средина се можеби потценети, но сосема коректните Часар и Лекаи. На пивотменската позиција, Унгарците се бараа неколку години, со тоа што Зубаи трошеше најголем дел од времето на терен, а не беше вистинскиот квалитет за нешто повеќе. На ова првенство очекувам и  се надевам дека шанса ќе добие младиот Банхиди. Сигурно очекуваат дека можат да ја нападнат Хрватска и да го бркаат второто место.

Клучни играчи: Ласло Наѓ и Роланд Миклер

4.Белорусија

Белорусија е репрезентација која вака-така се изнаигра на првенствата во последните години, но е без значаен резултат. Прво нешто позначајно се случи во Полска, кога извадија одлични млади играчи и почнаа да создаваат интересна млада екипа, која очекувам да расте од година во година. Пуховски и Никуленкау се лидери на екипата, заедно со Шиловиќ и надополнети со Кулеш, Јуринок, Каралек, Кадкевич и голманот Салдаценка, сочинуваат екипа која е спремна да се надигрува со секого. Го покажаа тоа на последниот меч од евроквалификаиите кога ја победија Србија. Не знам колку би имале сила да изненадат една од првите три репрезентации, но четвртото место е реално.

5. Чиле

Чилеанскиот тим ќе го имаат четвртиот последователен настап на Светското првенство во Франција. Чиле во 2010 година беше домаќин на Пан-американските првенство и го освои бронзениот медал. Оттогаш имаат голем напредок. Поранешниот шпански репрезентативец Матео Гаралда е предводник на чилеанската репрезентација, која на ова СП ќе биде ослабена за неиграњето на пикерот Марко Онето, кој е повреден, но има повеќе ракометари кои играат во Асобал Лигата и нема да биде толку лесно против нив како што веројатно им изгледа на противницте. На последниот Пан Американски шампионат, групната фаза ја минаа само со еден пораз, а во полуфиналето беа подобри од Уругвај, пред воборбата за трофејот да го намачат Бразил.

6. Саудиска Арабија

Најголемата земја од блискиот исток дваесетина години, е редовен учесник на големите ракометни првенства без забележителен успех. Во 2012 година, Саудиска Арабија го назначија  трофејниот хрватски тренер Ненад Кљаиќ, олимпискиот шампион во 1996 година, за да донесе повеќе тактички и технички вештини во националниот тим. По краткото искуство во катарскиот клуб Ал Рајан, период во кој кормилото го превзема Горан Ѓокиќ, хрватскиот стратег повторно се врати на клупата на Саудиска Арабија во декември 2015 и заврши 4-ти на првенство 2016 што се одржа во Манама. Саудијците ќе имаат за цел да го постигнат највисокиот пласман во својата историја во Франција (19 место во 2003 и 2013 година) за нив ова ќе биде 8-мо учество на Мундијалите.

ВАНЧО ДИМОВСКИ

Норвешка – Германија 33-34

Во првиот полуфинален натпревар се сретнаа репрезентациите на Норвешка и Германија, двете најголеми изненадувања на ова првенство. Двете репрезентации влегоа во овој натпревар максимално мотивирани за победа и пласман во финалето што резултираше со неизвесна завршница чиј крај го видовме после две продолженија.

Во првото полувреме видовме изедначена  игра од двете репрезентации во која доминираа одбраните на двете репрезентации. Норвешката репрезентација започна со 6-0 одбрана додека Германците комбинираа со 5-1 и 6-0. Двете репрезентации играа агресивно во одбраната обидувајќи се да не им дозволат на бековите да шутираат кон голот од изградени позиции. Прво поголемо водство направи репрезентацијата на Германија која што ги искористи двете исклучувања во Норвешката репрезентација во 11-та минута и успеа до 16-та минута да дојде во водство од 4 гола. Но ова водство воопшто не го наруши ритамот на игра  на Норвежаните кои заиграа поагресивно во одбраната и заедно со одбраните на  Еревик успеаа да го изедначат резултатот во 26-та минута на 12-12 и во следниот напад да прејдат во водство 13-12. До крајот на полувремето Германија успеа да направи пресврт и на полувремето да отиде со еден гол предност 14-13. Во овој дел од играта кај Норвешката репрезентација се истакнаа голманот Еревик и играчите Мурхол, Хабсен и Јондал со по 3 гола а кај Германците Реихман постигна 6 погодоци, Дамке  2.

Второто полувреме наликуваше на првото. Повторно двете репрезентации продолжија со својата агресивна игра во одбрана на која се надоврзаа одбраните на голманите на двете репрезентации а посебно се истакна голманот на Норвешка,Еревик. До 50-та минута резултатот беше изедначен кога Норвешката репрезентација го искористи исклучувањето на Кун и поведе со 2 гола разлика.До крајот на натпреварот Германија успеа да го анулира ова водство на  Норвешка и со голот на Дамке на 20 секунди пред крајот да го изедначи резултатот и да се избори за продолжетоци.

Неизвесноста околу победникот на овој натпревар и првиот финалист продолжи и во продолжението на натпреварот но овојпат репрезентативците на Германија влегоа со гол предност во последните 2 минути и успеаа да ја одбранат таа предност и да победат на овој натпревар што значеше и пласман во финалето.

Најдобри кај Норвешката репрезентација беа Бјорнсен со 8 гола,Мурхол и Јондал со 5 гола и Сагосен со 4 а кај Германската репрезентација најмногу се истакна Реихман со 10 гола,Хафнер и Кун со 5 гола и Фат со 4 гола.

Шпанија – Хрватска 33-29

Во вториот полуфинален натпревар се сретнаа репрезентациите на Шпанија и Хрватска кои што беа во групата на фаворити за освојување на првото место на  ова Европско првенство.

Хрватската репрезентација добро го отвори натпреварот и веќе во 4-та минута имашсе водство од 3 гола разлика. Агресивната 5-1 одбрана на Хрватите им зададе многу мака на противничките ракометари да дојдат до позиција за шут кон голот и ги наведе да направат и неколку технички грешки. Селекторот Кадењас се обидуваше со ротација на играчите во нападот и со агресивна одбрана да не и дозволи на Хрватската репрезентација да ја зголеми разликата и тие напори вродија со плод дури во 23-та минута кога Шпанците успеаа да го израмнат резултатот 13-13. Во тој момент Хрватска го изгуби ритамот на игра што го имаше од почетокот на натпреварот и беше принудена да прејде на 6-0 одбрана што не беше голема пречка за ракометарите на Шпанија да дојдат до позиција за шут кон голот.Посебен проблем во одбраната на Хрватите беше како да се спречи пикерот Агинагалде и уфрлањето на крилата на втор пикер. Од 23-та минута репрезентацијата на Шпанија ја превзема контролата на играта во свои раце и до крајот на полувремето успеа да создаде предност од 4 гола и на одмор д аотиде со резултат 18-14

Во второто полувреме Хрватската репрезентација се обиде повторно со 5-1 одбрана да воспостави рамонотежа во играта и да ја намали предноста на Шпанија.Тоа и успева во 46-та минута кога успева да дојде до само еден гол негатива, 24-23 и во наредниот период до 54-та минута да игра гол за гол недозволувајќи и на Шпанската репрезентација да има поголема предност од два гола. Во 54-та минута со две последователни технички грешски Хрватите им овозможуваат на репрезентативците на Шпанија да дојдат до 4 гола разлика и со тоа да ја сведат на минимум шансата на Хрватска за целосен резултаски пресврт до крајот на натпреварот. Во тој период кај Шпанците посебно се истакна Гарсиа кој со своите голови и игра во нападот им овозможи на своите соиграчи да дојдат до победа на овој натпревар и да се пласираат во финалето.

Најзаслужни за победата на Шпанија беа Гарсија и Ривера со 6 голови и Агинагалде со 5, а во тимот на Хрватска одлични беа Слишковиќ со 6 голови и Копљар и Мариќ со 4 гола

По првиот натпреварувачи ден во овие две групи фаворитите обезбедија предност пред вториот круг кој на програмата е на 18.01.2016.

Шпанија 32-29 Германија

Во групата Ц се наоѓа можеби и најголемиот фаворит за освојување на титулата (заедно со Франција), репрезентацијата на Шпанија. Иако забележаа два бода, тие не победија лесно на дуелот со Германија. Германците предвреме не се предадоа и по првите 6 минути водеа со 6-4. Во 10-та минута имаа предност од 10-9, за потоа Шпанците да направат серија од 9-1 и да поведат со 18-11. Тука започнува сосема друга приказна во која екипата на Дагур Сигурдсон направи серија од 4-0.

Во првите 15 минути од второто полувреме се играше гол за гол (26-22), но во 47-та минута серијата на Германците ги приближи на 26-25 и тука завршува германската приказна. Шпанија ја превзема контролата над натпреварот со серија од 5-0, а во тоа помогнаа Арпад Штербик кој одбрани 13 удари, Валеро Ривера беше најефикасен со 7 голови, а Томас му се придружи со шест. Колку е моќна Шпанија говори фактот дека сите ракометари освен Миндегија и голманите се запишаа во листата на стрелците.

Шведска 23-21 Словенија

Селекторот Веселин Вујовиќ во својата премиера на голмемите натпреварувања со репрезентацијата на Словенија, за малку ќе приредеше сензација против Шведска.

По првите 10 минути во кои Словенија водеше со 3-2, на полувреме двете селекции заминаа со уверливи 16-9 на контото на Шведска.

Три минути од вториот дел беа доволни за Шведска да ја достигне највисоката предност 18-10, тука Вујовиќ и екипата започнуваат да се подигнуваат. Во тринаесет минути направија серија од 8-1, Зорман, Габер и Гајиќ постигнаа по два, додека Цингесар и Кавтичник по еден за да ја донесат Словенија на гол негатива, 19-18, а со погодокот на Бомбач во 50-та минута дојдоа во егал 20-20. Во 55-та минута при изедначен резултат, Гајиќ промашува пенал, а Кондрадсон и Лукас Нилсон ја донесоа победата на Шведска.

Унгарија 32-27 Црна Гора

Унгарија немаше проблеми со, по многумина, најслабата екипа во група Д. Составот на Љубомир Обрадовиќ по полувремето кое го загуби со 16-12, најмногу што можеше да направи во продолжението, го направи до 48-та минута кога преку Шеваљевиќ и Чавор дојдоа до -2 (23-25). Следеше серија од 4-0 за Унгарците која ги докрајчи Црногорците чија наслабата алка им беа голманите (Мијатовиќ не одбрани ниту еден од 16 удари, додека Ристановиќ имаше четири интервенцции и еден седмерец од 21 удар кон голот).

Данска 31-25 Русија

Шестте погодоци предност на Данска пред Русија можеби не е најреалниот резултат (слично како натпреварот меѓу Македонија и Франција), бидејќи на полувреме Русите имаа 13-13 и држеа приклучок се до 52 минута кога бркаа минимална негатива, а резултатот беше 24-23. Но на крилата на фантастичниот Ландин (15 одбрани и два седмерци), Данците прават серија од 6-1 и само за пет минути ја победија до тогаш опасната Русија. Одлична партија во дресот на Данска пружи Дамгард кој постигна четири погодоци исто како и Микел Хансен.