Ракометарите на Борец ја остварија втората победа во Супер лигата. Во спортската сала „Гемиџии“ екипата на Борец во рамките од второто коло го совлада РК Прилеп со 25:20 (10:8) и повторно ги израдува своите фанови.

Голманот на ГРК Борец Огнен Трајковски за 24Ракомет изјави:

Мораме да бидеме задоволни од почетокот на сезоната, две победи од два натпревари. Против Прилеп пресудна беше огромната поддршка од публиката во текот на целиот натпревар и тимската игра како во нападот така и во одбраната. Како што покажува и самиот резултат 20 примени погодоци само го потврдува одличното издание на одбраната и голманите на овој натпревар.

Во третото коло ракометарите на РК Борец гостуваат во Скопје, противник е тимот на Илија Темелковски, Тинекс Пролет. Младиот голман на Борец за овој натпревар изјави:

РК Тинекс Пролет е одлична и воиграна екипа и ќе не очекува навистина тежок и цврст натпревар. Како и досега секако одиме и се надеваме на победа.