Ракометарите на Струга по поразот во Скопје од Бутел минатото коло, се вратија на победничките патеки во Првата Лига, откако славеа на домашен терен над Делчево Вардар со убедливи 40:26. Гостите имаа во ростерот само 11 ракометари, па не можеа да направат нешто повеќе на овој дуел.

Само на стартот беа конкурентни и водеа со 1:4, домаќинот стигна до 4:4. Делчево повторно водеше со 4:5, па 6:8, но тука некаде застанаа избраниците на Горан Велков. Струга направи серија од 4 голови за 10:8, а комплетниот пад се случи по 13:11, кога домашните со 8 голови по ред заминаа на пауза со високи 21:11.

Вториот дел беше чиста формалност и немаше многу возбудувања, па разликата порасна на 16 разлика, се до конечни 40:26. Најдобри во домашниот состав беа Цветан Кузманоски со 8 и Томе Нацев со 7 голови, додека кај Делчево се истакна Гоце Ѓорѓиевски со 10 погодоци.