Во натпревар од петтото коло на ракометната Супер лига, Вардар Јуниор беше домаќин на Прилеп. Во малата сала на спортскиот комплекс „Јане Сандански“, помладиот тим на Вардар имаше сили за само едно полувреме, а прилепчани по шеесете одиграни минути се радуваа на четвртата победа овој пат со резултат 24-32.

Младите ракометари на Пепи Манасков на самиот почеток создадоа предност од два погодока кои ги одржуваа до 21-та минута. Во последните  десет минути од првиот дел ракометарите на Прилеп најпрво го изедначија резултатот на 10-10, а веќе во наредната 25-та минута поведоа со голот на Турченко. Во неизвесната завршница на првото полувреме звукот на сирената означи крај за конечни 13-13.

Во вториот дел гостите ја имаа контролата над резултатот, а во 40-та минута првите два гола предност (16-18). Кога веќе беше разбиена противничката одбрана, ракометарите од Прилеп ја зголемуваа својата предност до највисоки осум погодоци 23-31 во 59-та минута. До крајот на натпреварот двете екипи постигна по еден гол за конечни 24-32.
Најпрецизен на теренот беше Дмитри Турченко со девет голови, а Шаренац додаде осум. Кај Вардар Јуниор најрасположен беше Чурлевски со шест голови.

ФОТО: ФИЛИП ВИРАНОВСКИ