Во вториот натпревар од седмото коло во македонскиот ракометен плеј-оф, актуелниот шампион Металург во Автокоманда убедливо ја совлада екипата на Прилеп.

Одличната одбрана предводена од Никола Митревски, беше главната причина ракометарите на Прилеп првиот гол да го постигнат по осум минути игра. Сепак бројните технички грешки во нападот на „сино-белите“ овозможија скромна предност од 2-0. Две минути беа потребни за ракометарите на Прилеп да го израмнат резултатот, а неизвесноста траеше до 16-та минута. Со промената на голманската позиција, во средината на првото полувреме ракометарите на Металург направија серија од 4 голови во низа како најава за конечната победа. Највисоката предност во првиот дел, Металург ја создаде во последната минута преку Ојлески за 14-7, до звукот на сирената гостите постигнаа уште еден погодок за конечни 14-8.

По еден прецизен удар од седум метри на двете страни, први гол од игра постигнаа ракометарите на Металург со атрактивна завршница на Гоце Ојлески за 16-9. Истиот ракометар постигна погодок и во следниот напад, а Голубовиќ ја заврши серијата на Металург за девет голови предност 18-9 во 38-та минута. За првата двоцифрена предност Металург почека до 46-та минута кога Бојан Маџовски го постигна својот прв гол, а дваесет и втори за домаќините. Костески за прв пат на натпреварот ги постави највисоките единаесет голови разлика во 52-та минута, а истиот ракометар стави точка на оваа средба за конечна победа на Металург од 30-20.

Најпрецизен во редовите на Металург беше Дарко Џукиќ со седум погодоци, Ојлески постигна шест, а Костески пет. Во гостинскиот состав Бозаровски седум пати стрелаше прецизно.