Во последниот дуел од СЕХА лигата за оваа сезона, македонскиот првак Металург пред своите навивачи го претрпе дванаесетиот пораз оваа сезона во регионалното натпреварување второ од белорускиот шампион Мешков Брест.

РК МЕТАЛУРГ 17-26 РК БРЕСТ МЕШКОВ (9-12)

Ракометарите на Металург уште на самиот почеток ја наметнаа својата игра и благодарение на брзата транзиција и грешките во нападот на противникот го контролираа резултатот и играта. Но во средина на првото полувреме, Мешков ја зацврсти својата одбрана, а неколку промашени обиди на „сино-белите“ гостите ги претворија во голови кои по низата
од 6 голови го насочија резултатот на семафорот во своја корист. Во 21-та минута Манојловиќ ги постави највисоките 4-8 за Белорусите. Металурзите се приближија на само два погодока заостаток, со двата гола на капитенот Ојлевски, но до звукот на сирената Вуќиќ ги постави конечните 9-12.

Почетните минути од второто полувреме му припаднаа на белорускиот првак, Вуќиќ ја продолжи својата серија од три погодоци во низа, а Шиловиќ ја заврши за највисоките шест голови предност 9-15. Маџовски за момент ја прекина серијата, но мотивираните ракомтари на Брест продолжија со прецизните удари. По четири неодговорени погодоци Мешков ја создаде највисоката предност од осум голови, 10-18.
До крај на натпреварот во рутинирана завршница, белорусите го завршија натпреварот со победа од 17-26 за потврда на третата позиција. Македонскиот шампион сезоната ја заврши на седмото место.
Најпрецизни во екипата на Металург беа Голубовиќ и Ојлевски со четири, колку што постигнаа Вуќиќ и Манојловиќ за белорускиот шампион.

ФОТО: ФИЛИП ВИРАНОВСКИ

---

Забрането превземање на фотографии без одобрение од Редакцијата

---