Во Париз се одигра битката на титаните, во рамките на шестото коло од Лигата на шампионите. Моќниот француски состав ПСЖ, ги вкрсти копјата со унгарскиот шампион и финалист од минатогодишното издание на Ф4 турнирот во Келн.
Гостите го постигнаа првиот погодок, но серијата од четири невозвратени прецизни удари на ПСЖ им овозможија контрола врз играта и резултатот. Гостите брзаа со своите удари, а по секој примен гол, домаќините најчесто преку Карабатиќ или Хансен ја завршуваа својата акција за неколку секунди. Брзиот и динамичен ракомет најдобро го искористија ракометарите на Нока Сердарушиќ, а постојаното водство од два гола, во последната минута од првиот дел Хансен и Вори го претворија во разлика од четири погодоци, за конечни 16-12 по првите триесет минути.
Во вториот дел, французите имаа и пет погодоци предност, но унгарскиот шампион со серија од 4-0, во 36-та минута се доближи на минимална негатива од само еден гол. Веспрем имаше и напад за водство, но Палмарсон беше непрецизен, по што ПСЖ преку Хансен повторно создаде предност од три погодоци. Проблемите за домаќините започнаа во 45-та минута кога предводникот на ѕвездениот тим Никола Карабатиќ заработи директен црвен картон. Конфузноста во играта на ПСЖ резултираше со лесни погодоци за гостите кои преку Сулиќ(на два пати) и Угалде на десет минути до крајот за прв пат го изедначија резултатот на 22-22. Со неизвесни 27-27 натпреварот влезе во финалните две минути. Одлични меѓу стативите беа Алиловиќ и Омејер, но фантастичниот удар на Хансен на една минута пред крај не можеше да се одбрани затоа домаќините имаа предност од 28-27. Последниот напад за израмнување им припадна на гостите, но Момир Илиќ наместо на својот му додаде на противничкиот ракометар, а Бараше ја искористи укажаната шанса и ги постави конечните 29-27. Веспрем до крајот на натпреварот доби уште една шанса за почесен гол и минимален пораз, но голманот Аноне го одбрани ударот од седум метри на Илиќ и стави точка на овој натпревар.
Микел Хансен со 11 погодоци беше најдобар на теренот, Лук Абало уфрли 7 голови за својот тим, додека во гостинските редови, Палмарсон со седум и Илиќ со пет беа најрасположени за игра.

ФОТО : TeamPics/PSG