Пред заминувањето на турнирот во Умаг, македонската ракометна репрезентација го одржа првиот собир во „Јане Сандански“. Националниот тим со подмладен состав заминува во Хрватска, а селекторот Обрван очекува токму младата гарда да ја искористи оваа шанса и да се избори за стандардно место во селекцијата.

Во Умаг ќе недостасуваат голем дел стандарни репрезентативци, а шанса ќе добијат неколку помлади ракометари. Што очекувате од нив на овој турнир?

Обрван:

Да , неколку стандардни репрезентативци се повредени. Ќе се обидеме во Умаг да им дадеме шанса на неколку млади ракометари, без резултатски императив, на кои ќе им бидат толерирани и грешките. Во секој случај ќе се обидеме да го дадеме максимумот што се однесува до пристапот на играта, дисиплината, и да видиме кој од тие 6-7 млади ракометари колку може да даде за репрезентацијата во иднина.

Хрватите велат дека Македонија ќе ја глуми Норвешка, кого ќе глуми Хрватска за Македонија?

Обрван:

Не знам зошто даваат такви изјави. Ние нема никого да глумиме, ќе играме максимално со кадарот со кој моментално располагаме и да видиме каква игра можеме да пружиме. Не не интересира како Хрватска размислува и како тие сакаат да играат.

Дали и во Полска ќе им дадете шанса на дел од овие млади ракометари?

Обрван:

На нив е да се наметнат во репрезентацијата, а наше е да видиме кои се тие, и секако дека поедини ракометари имаат шанса да се најдат на Европското Првенство во Полска.

Каква е стратегијата на Македонија во Полска? Ќе се оди на резултат или..?

Обрван:

Премногу е рано да одговорам на тоа прашање. Ние на секое првенство одиме да обезбедиме најдобар пласман. Ќе се обидеме да ја поминеме групата која е исклучително тешка и да се пласираме во вториот круг, а наш најголем фокус ќе бидат квалификациите за Олимписките игри. На ЕП во Полска ќе се обидеме да го извечеме максимумот, и можеби да извадиме некој млад квалитетен ракометар.