Во третиот натпревар од овогодинешното издание на ЕХФ Лигата на шампионите, Металург стигна до втората победа. Жртва на четата на Червар беше норвешки Елверум кој со пораз од 22-19(10-12) си замина од арената Борис Трајковски. Норвежаните имаа водство по првите триесетина минути, но со серија од 7-2 на почетокот на вториот дел металурзите го вратија водството кое успеаа да го одржат до самиот крај за втора победа во ЕХФ Велукс Лигата на шампионите.

МЕТАЛУРГ-ЕЛВЕРУМ 22-19 (10-12)

Јанко Божовиќ погоди со удар од девет метри за водство на Металург од 1-0,а на спротивната страна возврати Оверби за 1-1. Фокусот на норвешката одбрана беше насочен кон Јанко Божовиќ, а во нападот најчесто пробиваа на линијата од шест метри што се покажа како вистински потег за водство од 2-4 во 13.минута. Металург одговори со игра преку Пешевски на линијата од шест метри, кој во комбинација со Божовиќ беше иницијатор на серијата од 4-0, по која тимот од Автокоманда по погодокот на Мраковчиќ се врати во водство од 6-4 во 18. минута. Меѓутоа скандинавците продолжија со брзата и дисциплинирана игра, а на голот го имаа извонредниот Нергард кој ги запре сите налети на Металург. Најпрво Линдбое донесе ново израмнување од 7-7, а во следниот напад Буруд го врати Елверум во водство од 7-8. Во последните десетина минути норвежаните ја одржуваа минималната позитива која со погодокот на Стегавик во последната минута изнесуваше 10-12 по триесет минути игра.

Металург со фантастична серија од 7-2 го отвори вториот дел и благодарение на налетот на младите Костевски, Маџовски и Мраковчиќ комплетно го сврте резултатот во своја полза за водство од 17-14 во 42.минута. Плаво-белите продолжија со одличната игра, а Матиќ со два важни гола ја одржуваше сигурната позитива. Дупјанчанец бранеше одлично во клучните моменти, а Матиќ со својот трет погодок ги донесе највисоките +5, 22-17 на минута до крајот. Гостите на крајот успеаа да го ублажат поразот за конечни 22-19 и втора победа на Металург во Лигата на шампионите.

Најпрецизни во составот на Металург беа Божовиќ со шест и Мраковчиќ со четири постигнати погодоци. Во гостинската екипа најрасположен за игра беше Митровиќ со шест постигнати погодоци.

Следниот викенд Металург (11.10) Металург гостува во Данска на екипата на Скјерн.