Металург на гостувањето во Логроњо против Ла Риоха ја бараше својата прва победа во овогодинешното издание во Лига на шампионите. Металург  одлично го почна натпреварот со расположените Филип Миркуловски и Ренато Вугринец.
Иако екипата од “Автокоманда” во еден момент имаше и три негатива 12-9, со одличните одбрани на Никола Митревски и погодоците на Вугринец и Димовски дојде до изедначување 12-12. Првото полувреме заврши изедначено 13-13. По 30 минути игра во составот на Металург само тројца ракометари се запишаа во листата на стрелци.

Во второто полувреме домашните ракометари го зголемија водството плус два 16-14 во 35 минута. Одличната игра на Ла Риоха продолжи и во останатите минути од натпреварот кога со головите на бразилецот Сантос стигнаа до плус три 19-16. Грешките на двете екипи продолжија да се редат, Ла Риоха од сета ситуација повторно го врати водството од три разлика 21-18 во 45 минута. Во останатиот дел од натпреварот Металург се повеќе почна да тоне, разликата на домашниот тим се зголемуваше од минута во минута. Во последните минути Металург ја намали негативата за конечни 31:27.

Најефикасен во Металург беше Филип Миркуловски со осум погодоци, по шест постигнаа Наумче Мојсовски и Ренато Вугринец.