Десниот бек на екипата на Е. Работник, Лазо Мајнов утре заминува за Дубаи каде што ќе ја продолжи својата кариера. Тој одново оди во интернационалци, а до крајот на сезоната ќе биде дел од екипата на Ал Наср.

„Ова беше понуда која што не се одбиваше. Задоволен сум од условите и утре ќе заминам за да го потпишам договорот со мојот нов тим. Договорот ќе биде до крајот на оваа сезона, а во текот на шампионатот ќе разговараме и за понатамошна соработка“, информираше Мајнов, кој вчера против Металург 2 го одигра последниот меч за Работник.

Тој се договори со сега веќе својот претходен клуб така што нема да има никакви проблеми околу заминувањето.

„Се договоривме со одговорните во клубот и нема никакви проблеми. Тие имаа разбирање така што пријателски се разделуваме. Задоволен сум од тоа што наидов на разбирање од нив“, рече Мајнов.

Тој е играч кој во својата кариера настапуваше за екипите на Вардар, Металург, Загреб, Трембле… и уште неколку други тимови во коишто имаше забележителни партии. Има и над 50 натпревари во репрезентацијата на Македонија. Инаку, има 37 години и добро искуство зад себе.