Сите погледи во 4. коло од Супер машката лига се насочени кон градот покрај езерото, каде што составите на Охрид и Радовиш ќе имаат пресметка за меѓусебен престиж и за подобрување на позицијата на табелата. Ова е дуел на две екипи коишто конкурираат за место во плеј-оф групата, а тоа значи дека нема опуштање и дека денеска ќе влезат со сите сили по бодови. Предноста поради домашниот терен е за охриѓани, но дефинитивно нема да биде лесно бидејќи и едните и другите ќе сакаат да се изборат за победата и да дојдат до три бода. Црногорскиот интернационалец Мирко Мајиќ вели дека проблем за неговиот тим се повредите.

„Охрид е секако фаворит на овој натпревар, не само поради домашниот терен, туку и поради квалитетот. Ние за жал не сме комплетни и тоа ни претставува голем проблем, бидејќи имаме кратка ротација. Нема да играат Стефан Чизмовиќ и Милан Левов поради повреда, но секако ние одиме таму да дадеме се од себе и ако ни се укаже каква била прилика, ќе ја искористиме најдобро што знаеме.“ – вели Мајиќ.

Дуелот меѓу Охрид и Радовиш се игра со почеток во 19:30 часот во СЦ „Билјанини Извори“.