Македонската ракометна репрезентација за жени до 19 години обезбеди пласман на Европското првенство кое ова лето ќе се одржи во Шпанија. По победата над Исланд денес е совладана фаворизираната екипа на Холандија.

Холандија19-26 Македонија(8-12)

Почетното водство им припадна на младите холандски ракометарки, но расположената македонска селекција предводена од Керамичиева, со три гола во низа го превзема водството и контролата над играта. Средината на првото полувреме беше клучна за високото водство на македонските репрезентативки, со серија од 5-1 домаќинот на овој квалификациски циклус ја најави својата кандидатура за Шпанија. Во 22-та минута Тодоровска беше прецизна за првата предност од пет погодоци 5-10. Разликата македонските репрезентативки ја задржаа до 27-та минута, а на пауза замина со резултат 8-12.

Второто полувреме ја потврди доминацијата на селекцијата на Симе Симовски. Во 34-та минута со погодок на најефикасната ракометарка на теренот, Теодора Керамичиева, македонските репрезентативки ги достигнаа првите седум погодоци предност 8-15.

Четириесет и пет минути беа потребни за првата двоцифрена предност од 11-21. Кога веќе беше се познато во рутинирана завршница, македонските репрезентативки им допуштија на ракометарките на Холандија да се приближат на пет голови разлика, 18-23. Тоа беше се што направија Холанѓанките, до крај на натпреварот Македонија постигна уште три гола, додека Холандија постигна само еден за конечни 19-26.

За репрезентацијата на Македонија, Керамичиева постигна 10, а Тодоровска ја следеше со шест. Кај Холандија најрасположена беше Ниувенвег со три прецизни удари од пет обиди.

ФОТО: ФИЛИП ВИРАНОВСКИ