Македонската ракометна репрезентација попладнево ќе замине за Словенија каде ќе одигра два контролни натпревари со домашната селекција како дел од подготовките за Европското првенство 2016. Ивица Обрван одбра 21-ракометар за овие средби, затоа во Скопје ќе останат голманот Даскаловски и младиот бек Мартин Велковски.

По пристигнување  во Кршко, македонската селекција од 18:00 во понеделник ќе го одигра првиот контролен натпревар со избраниците на Веселин Вујовиќ, додека наредниот ден од 18:30 во Целје ќе го одиграат и вториот пријателски дуел. Овој дел од подготовките селекторот Обрван ќе го искористи да ја донесе конечната одлука околу 16-те патници за Краков.

Европското првенство започнува на 15 јануари, а до тогаш Македонија, на 10 и 11 јануари, ќе одигра уште две контролни средби во Скопје против селекцијата на Црна Гора.