Машката кадетска репрезентација на Македонија денеска тргнува со подготовките за турнирот во Полска на кој ќе учествува во текот на следната седмица. Ова е турнир во рамки на ЕХФ-неделата и одлична можност за проверка на младите ракометари за кои ова е прв заеднички собир.

Брестовац повика 18 ракометари на кои смета за турнирот во Плоцк, а тие ќе треба да ја оправдаат довербата.

Првиот собир е денеска од 18 часот во Расадник, а на списокот има и ракометари кои веќе настапуваат во Супер лигата во тимовите на Вардар јуниор и Металург 2 така што тие ќе треба да го покажат своето искуство од силни натпревари.

Покрај тоа во составот е и Мартин Серафимов, кој е еден од најмладите стрелци во Лигата на шампионите, а сезонава покрај во најсилниот европски куп играше и во СЕХА-лигата.

Овие натпревари се во рамки на подготовките за настапот на шампионатот за кадети кој ќе се одржи следното лето, како и за Светското првенство за кадети кое се одржува во Скопје во 2019 година.