Во првиот натпревар од новата сезона во ЕХФ Лигата на шампионите актуелниот Европски шампион Барселона во Манхајм беше поразена од домаќинот Рајн Некар Ловен со резултат 22-21 (10-9). Каталонците тешко се снаоѓаа против подвижната германска одбрана, а во последните минути немаа решение за Енди Шмит кој ги постигна клучните голови за победа на својот тим.

Сораиндо го постигна првиот погодок на натпреварот за водство на Барселона од 0-1, но германците многу брзо ја преземаа иницијативата и со двата гола на Енди Шмит поведоа со 2-1 во 6.минута. Барселона слабо функционираше во комбинираната седморка со која Чави Пасквал го стартуваше премиерниот натпревар. Гвардиола по една извонредна контра го донесе највисокото водство за Рајн Некар од 6-3 по 15 минути игра. Тоа беше момент по кој Чави Пасквал го испрати на теренот Кирил Лазаров кој ја врати Барселона на вистински колосек. Нашиот интернационалец постигна три погодоци во серијата од 4-0 која ја имаше Барселона и во 22.минута ги врати каталонците во водство од 6-7.Петерсон одговори на спротивната страна за 7-7, а играта гол за гол продолжи и во наредните две минути. Крилата на Рајн Некар Ловен, Генсхајмер и Грецки постигнаа два брзи гола со кои германците поведоа со 10-8, а точка на првиот дел стави Филип Јиха за конечни 10-9 по триесет минути игра.

Цели пет минути беа потребни за Генсхајмер да го постигне првиот гол во вториот дел за 11-9, а Лазаров со нови три гола одговори на најдобар начин и ја одржуваше Барселона во минимална негатива 14-13 во 42.минута. Ентрериос донесе ново израмнување во 47.минута, а три минути покасно Томас ја врати Барселона во водство 17-18. Сепак последните десетина минути им припаднаа на домаќините кои успеаа да направат серија од 3-0 која со гол ја затвори Енди Шмит за водство од 20-18 на четири минути до крајот. Барселона преку Сигурдсон на двапати се враќаше на гол негатива, но Шмит со погодок на триесетина секунди до крајот донесе недостижни 22-20 и голема победа за Рајн Некар Ловен на стартот на ЕХФ Велукс Лигата на шампионите. Виктор Томас со својот трет гол ги постави конечните 22-21.

Генсхајмер со шест и Грецки со четири погодоци беа најпрецизни во екипата на Рајн Некар Ловен, а на спротивната страна нашиот интернационалец Лазаров беше стрелец на шест гола.