Ракометарите на македонскиот шампион Вардар се освојувачи на првиот меѓународен ракометен турнир „Вардар“. Избраниците на Раул Гонзалес во финалето го совладаа шведски Кристијанштад со резултат 32-24 (16-11), и со тоа и официјално станаа први освојувачи на турнирот кој се очекува да прерасне во традиционален.

Освен водството од 0-1 кое гостите го имаа на самиот почеток, вардарци имаа комплетна доминација во останатиот дел на натпреварот. Дибиров го постигна првиот гол за Вардар и израмни на 1-1, а Карачиќ го донесе првото водство за Вардар од 3-2 во 4 мин. Од тој момент црвено-црните постојано ја зголемуваа разликата, а Лука Циндриќ во 26.минута го донесе највисокото водство од 16-9. Во последните четири минути од првиот дел Кристијанштад постигна два погодока и на полувреме се замина со резултат 16-11.

Предноста од полувремето вардарци ја одржуваа и во вториот дел. Филип Лазаров со својот прв гол ги врати највисоките + 7, 25-18, а атмосферата кулминираше кога преку извонредниот цепелин Лазаров-Манасков, Вардар стигна до највисоките 32-24, што беше и конечен резултат на натпреварот. Со оваа победа црвено-црните се освојувачи на првиот турнир кој е во нивна организација и кој се очекува да прерасне во традиција.

Најпрецизни во редовите на Вардар беа Македа со 5, а Шишкарев и Циндриќ постигнаа по 4 погодоци.