По поразот во првото коло од шампионот Вардар, ракометарите на Металург очекувано славеа на гостувањето кај новакот во СЕХА Лигата, српскиот тим Динамо Панчево, со 20:25. Избраниците на Лино Червар практично уште по првиот дел ја обезбедија победата, бидејќи водеа со 7 голови разлика, 9:16.

Стартот беше според посакувањата, 0:8 по 11 минути, а домаќинот не можеше да го најде патот до мрежата на голманот Арсиќ и првиот гол го постигна дури во 13 минута преку Јелиќ, а истиот играч намали и на 2:8. Во неколку наврати домашните имаа и минус 5, 7:12, 8:13, 9:14, но во финишот погодија Пешевски и Токиќ за убедливи 9:16 на паузата.

Во вториот дел се менуваа играчите на теренот, но тоа многу не се одрази на резултатот. Металург стигна до највисоки плус 9, 12:21 преку Мице Шилегов, а потоа и до „десетка“, 14:24, па до крајот се играше само формално за конечни 20:25.

Најдобар стрелец во победничкиот тим беше Анѓелиќ со 5 голови, Пешевски и Токиќ дадоа по 4, а голманот Арсиќ имаше 14 интервенции, додека кај домаќинот се истакна Стојановиќ со 4. Следен предизвик за македонскиот вицепрвак ќе биде хрватскиот Нексе, а натпреварот се игра в недела со почеток во 17:45 часот во СЦ „Борис Трајковски“.