Во првиот натпревар од денешната програма на Велукс ЕХФ Лигата на шампионите екипата на Киелце во вториот дел го скрши отпорот на гостите од Швајцарија и успеа да дојде до победа од 33-24 по која со 14 бодови е лидер во групата Д.

---

ГРУПА Д

КИЕЛЦЕ-КАДЕТЕН ШАФХАУЗЕН 33-24 (14-12)

Почетокот на натпреварот им припадна на домаќините кои имаа водство од 7-5. Но, благодарение на трите гола на Лингер, Кадетен се врати во игра и со серија од 3-0 успеа во 14 минута да го превземе водството поведувајки со 7-8. Израмнето беше се до 27 минута кога гостинскиот пикер Мансон успеа да погоди за 12-12, а домаќините со два гола до крајот успеаа да ги постават конечните 14-12 на полувреме.

Решавачки момент во вториот дел беше серијата на Киелце од 5-0 кога при резултат 19-17 успеаа да дојдат до високи +7, 24-17 во 43 минута. Лингер кој со три успешно реализирани контри во серија успеа да го врати Кадетен на -4, 24-20 но тоа беше се што успеаа да направат гостите на овој натпревар. Киелце со петтиот гол на Бутиќ во 55 минута успеа да дојде до +8, 29-21, а на минута до крајот Ткачик преку контра напад ги постави и највисоките 33-23 за полскиот тим. Лингер со својот 11 погодок на натпреварот ги постави конечните 33-24.

Најпрецизни во екипата на Киелце беа Чупиќ со 9 и Бунтиќ со 6 погодоци. Кај гостите од Швајцарија најрасположен за игра беше Лингер кој постигна 11 голови.