Вардар делува немоќно, ја загуби предноста од Скопје за 30 минути

Ракометарите на Пик Сегед за 30 минути ја достигнаа негативата која ја имаа од првиот меч и вардарци нема да се чувствуваат комотно во продолжението од средбата. Тие влагаат со големо заостанување и негатива од осум гола. Пик Сегед води со 17:9.

Од стартот на средбата домашните тргнаа силно. Вардар ги издржа првите неколку минути и одолеваше на нападите на противникот. Успеа да се избори и за водство, но после 4:3 дојдоа неколку лоши минути о домашните со серија од четири гола го свртеа мечот до 7:4.

Овие три гола разлика во корист на Пик Сегед ги поставија работите во далеку подобра насока за Пик Сегед и мечот почна да добива тек каков што не се посакуваше.

Унгарците влегоа сериозно во продолжението и почнаа на секој гол на Вардар да постигнуваат од два до три гола. Тоа им носеше постојано зголемување на предноста која во 25. минута беше седум гола, а Пик Сегед водеше 14:7.

На овој резултат Стојанче Стоилов постигна гол за намалување, а потоа одлука која може само да се очекува од Шпанците, кои досудија седум додавања после крената рака за пасивен и го поништија овој погодок.

Во следниот напад Пик Сегед веќе ги достигна осумте гола разлика од Скопје, а во 28 минута имаше и 16:7 додека Вардар делуваше немоќно во нападот. Конечно гол беше постигнат на истекот на 29. минута кога Даини Кристопанс дојде до третиот гол на овој меч за 16:8.

До крајот на првото полувреме имаше уште по еден гол на двете страни, па на одмор се замина со 17:9. Во овој дел од средбата најефикаен беше Деан Бомбач кој биеше без грешка и реализираше шестпати од шест удари, а 4 од 4 имаше Банхиди. Во Вардар најефикасни беа Кристопанс и Карачиќ со по три гола.