Ракометарките на Вардар го имаа првиот тренинг во новата година, и ги почнаа подготовките кон остварување на целта, пласман на Ф4 турнирот во Будимпешта.

Денеска екипата го имаше првиот заеднички собир, а веќе во петок се заминува за Подгорица каде треба да настапат на првиот турнир од Регионалната ВРХЛ лига.

На првата прозивка единствено недостасува голманката Мајса Песоа која е „заглавен“ на аеродромот во Истанбул, порадо лошото време. Ина Суслина е се уште под специјален третман по операцијата што ја имаше лани. Во консултација со лекарскиот тим ќе се реши кога ќе почне со заеднички тренинзи со тимот.

„Ние на секој меч влегуваме со подеднаква мотивираност. Нема разлика дали е пријателски меч, натпревар од ВРХЛ лигата или пак лига на шампионите. Се подготвуваме сериозно и целосно посветени на исполнување на зацртаните цели за оваа сезона. Верувам дека и девојките се подготвени за она што ги очекува во следните месеци. Овие неколку дена ќе повториме од она што го игравме во есенскиот дел од сезоната. Има доволно време да бидеме подготвени за ЛШ, и сериозно го сфаќаме секој предизвик што е пред нас, вели Давид Дејвис, тренерот на Вардар.

Уште на почетокот на турнирот во Подгорица се среќаваме со Будуќност, нашиот стар познајник, против кого треба Вардар да игра и во првото коло од Главната фаза на лигата на шампионите на 29 јануари исто така во Подгорица.

Вардарки во петок на пладне заминуваат за Подгорица, и веќе во сабота имаат дуел со Будуќност, а во недела се среќаваат со Крим. Дуелот со Будуќност е закажан за в сабота 18,30 часот во Подгорица. Мечот во недела со Крим Меркатор се игра во 16 часот.