Бранителот на трофејот во Лигата на шампионите, екипата на Будуќност со еден пораз и две победи го освои третото место на турнирот „Вардар“ кој од 29 август до 1 септември се одржува во Скопје. На финалниот ден во борба за бронзениот медал, Црногорките беа поуспешни од Лајпциг со 30-23.
Единствено првите 13 минути поминаа во неизвесна игра, а двете екипи постигнаа по пет погодоци. Будуќност со серија од 6-1 ја најави победата на овој дуел, а во последната минута од првиот дел црногорските шампионки имаа највисока предност од седум голови, 16-9.

Во второто полувреме Будуќност ја продолжи својата доминација, иако Драган Аџиќ направи бројни ротации во составот, ракометарките од Подгорица достигнаа до девет голови разлика преку младото крило Ујкиќ во 40-та минута. До крајот на натпреварот, ракометарките на Будуќност ја задржаа високата предност за конечни 30-23.
Најпрецизни во редовите на црногорскиот шампион беа Цвијиќ, Рајичевиќ, Павичевиќ и Ујкиќ со по пет погодоци, додека Павичевиќ и Неагу постигнаа по четири. Кај Лајпциг, Ланг беше прецизна девет пати.

Во натпревар за петто место екипата на Савехоф ја совлада екипата на Подравка со резултат 18-22 (10-11) и го освои петтото место на турнирот „Вардар“.